Conserti e esibisiòn
In tei nostri spetacoj, che gavemo tegnesto in quasi tute le regiòn italiane e in serti Paesi europei, serchemo de dar el fruto de'e nostre riserche che femo nei diversi canpi del saper uman (musicae, storico, linguistico, leterario, fiosofico, relijoso) come vien descrito ne'a pajna de'e atività.
La nostra xe n'asociasiòn sensa fin de lucro, e quasi tute le nostre atività xe sovenzionà coi proventi che ricavemo da'e nostre esibisiòn. I conserti che tegnemo i xe de tre sorte: quei co'l grupo folkloristico, quei co'l grupo de musica midioevae e quei eseguii nel piriòdo natalisio come faxeva i xampognari, tanto difusi, come in tuta Italia, anche ne'e nostre vali, come ne dixe tantisime testimonianse.
'N tuti i conserti vien sonà i strumenti musicaj da noantri ricostruii e ritrovaii, e tute le nostre esibisiòn vien fate in costume.
Quando se esibemo col grupo folkloristico 'ndosemo el costume tradisional, e el repertorio sonà va da musica tradisional cimbra e veneta, a quea de'a "tradisiòn regia" fata a la corte de Kaiser Franz Josef Von Hausburg (gavemo ritrovà tanta de'a musica che vegneva sonà par l'imperatore "Ceco Bepe" quando el xera a spender le vacanse estive ne'a nostra sità e ne'e nostre vali).
I nostri conserti x'en grado de ricrear piacevol atmosfere liga a'e tradisiòn, juste par feste a balo dove so poe balare diverse danse come la manfrina, la giga, le polke cavaline, el munecò, e sopratuto el Tzoty, la dansa tipica de'e popolasiòn cimbre.
Col grupo midioeval 'ndosemo abiti che serca de ricordar quei de' antichi trovador, minnesangher (che i xe stretamente presenti a la nostra storia e cultura), cantastorie, julari de corte e le jesta da lori cantà.
I strumenti che vien usà xe: ghironda, cantele, diana, corno rìsolo, racola, flauti e diversi tipi de percusiòn, e in serti nostri spetacoj ga partesipà 'nsieme a noantri xugojeri e spuafogo.
De particolar sugestiòn xe le esibisiòn che vien nel piriòdo natalisio co'l grupo de musica natalisia. El grupo, coi vestiti da pastor (ma 'nca da contadin, visto che'a tradisiòn de' xampognari xera, come puki sa, anca, e sarìa mejo dir sopratuto, 'na tradisiòn contadina), ga partesipà a numerose manifestasiòn natalisie sonando i bagatej (xampogne) oltre che altri strumenti come 'a fisarmonica, el corno risolo, trombon, "trombin wagneriàn" e flauti e piferi de ogni sorta.
L'alegria portà da'e dolsi melodie natalisie sonà da 'sti strumenti se compagna a'e benedisiòn ben aguranti che i sonadori fa, secondo 'n rito antichisimo che se podarìa definir magico, a'e persone che dà a lori qualcoxeta, come 'n vin brulè o 'na ciocolata calda, o che solo verxe la porta de'a so casa o del so negosio.
'N particolar del costume xe i canpanej tacà ai pìe, che i dà frequense alte in modo da (come se dixe da'e nostre parte) "scaciar i diaoli".
