Le danse tradisionai
Le danse e la musica popolar ga senpre avesto funsiòn de riunir in alegria la jente, jutando a conoserse l'un l'altro e a dar pi' forsa ai legami nea comunità . Le xe sta e la xe un dei mexi pi' 'nportanti utilixà dae minoranse etniche par mantegner vive le so spesifiche culturai e xe insoma un patrimonio 'nportante da non butar via.
Anca nea nostra vale, in Valpantena, se balava le danse popoar che xera tanto difuse de sicur fin a'o sciòpo dea seconda guera mondial; a testimoniansa dea difusiòn del balo popolar nea nostra vale ghe xe: cognomi, come i Danzi; nomi de contrade come par exenpio la contrada Ballarini, oltre a'e fonti direte che ga dà un filo condutore coa tradisiòn.
A diferensa d'altre xone d'Italia e d'Europa, purtropo el richisimo patrimonio de 'ste danse non se ga conservà par intiero fin a oncò, ma sol 'na parte. Però se pò isteso dir che un dei puchi 'nfluense oncò restà de l'amor par el balo se pò travar nel liscio.
La nostra asociasiòn ga ritrovà danse tradizionai e xe drio sercar de portarle par primo ai xovani in modo che 'sto patrimonio vegna coltivà e mantegnù vivo.
Tra'e danse tradisionai trovà ricordemo el Sieben Schritte (sete pasi) Cori Bepi, la manfrina de Camposilvan, el taco punta, el Tzoty de Valdiporro, el Basaneo (ballà in Cansiglio in occasiòn de matrimoni), e altre danse venete che se xe praticà in t'ei secoi anca nea xona abità dae popolasiòn cimbre come el "do pasi" e "la poesana".
Bisogna dir che le riserche da noantri fate in 'sto canpo se baxa par de pì sul laoro d' altri risercatori e d'altre asociasiòn che opera nea xona.
