La nostra storia
La nostra asociasiòn se ciama "Gruppo etnico-musicale dei Panganoti Cimbri" e xe nata in t'el 1998 par idea de Fausto Albertini. Ga sede a Noaie che xe 'n paexeto dea nostra valata, la Valpantena.
'I nostro grupo musical ga vita ben pì lontan in t'el tenpo rispeto a'a data dea so ufisiàl costitusiòn. Ga origini radicae nea tradisiòn musicae dei secoi pasà cresù nea tera dove abitemo: questo vol eser la continuasiòn de 'n grupo de musicisti ativi nea vila (situà a Novaglie) dea principesa Sissi, (mojere de l'imperator Francesco Giusepe D'Asburgo), al'epoca del'apartenensa de Verona al'inper austro-'ngarico.
Coa partensa dei mecenati austriaci, el grupo se ga molà e serti musicisti xe pasà a'a corte de vila Baladoro (che se trova nea contrà ai piè de Novaglie), e restà lì fin ala prima guera mondial.
El conte Arigo Baladoro xera al tenpo un dei pì grosi risercator de folklor europeo e gaveva tegnù viva la tradisiòn musicae grasie ai so musici. Ala so morte, in t'el 1927 tuto xe sta dismentegà!
Dopo qualche prova par recostruir el grupo, fata nei ani sinquanta dal'ultimo maestro Mario Grassi (maestro de Fausto Albertini, fondator de l'asociasiòn), un prim nucleo del novo grupo se forma a partir dai ani '80, fin a vegner ala costituasiòn legale 'rivà nel 1998.
D'alora l'asociasiòn xe cresù senpre pì, (anca se i 'npedimenti 'ncontrà non i xe 'sta puchi), faxendo riserca par trexentosesanta gradi co' atività che ga 'nteresà diversi canpi dea conosensa umana, da'a storia ala filosofia, da'a musica ala sinbologia, da'a riserca linguistica al ricupero de strumenti musicaj tradisionaj.
L'asociasiòn ga fato tanti conserti en tuta Italia e 'n Europa, e ànca ga vu la posibilità de partesipàr a varie manifestasiòn folkloristiche come l'Europeade e 'l festival de Saint-Chartier.
Par finir la Rejòn Veneto con Decreto Dirigensiale n.75 del 08/07/2002 ga iscrito la nostra asociasiòn al Registro Regionale de l'Asociasiòn de promosiòn sociale coa clasificasiòn AVR 43.
