El repertorio musicae
La nostra asociasiòn xe drio far (come ga fato fin da'a so nasita) 'n'intensa atività de riserca in t'el canpo de'a musica tradisionae de'a nostra tera ('n particolar Valpantena e Lesinia) ma anca de'a musica tradisional d'altre rejòn d'Europa che xe sta par cultura emparentà a la storia dei cimbri.
En t'ei nostri conserti non femo solo musiche tradisional nostrane ma ripercoremo anca coa musica i posti 'nteresà dai spostamenti dei cimbri: el percorso culturae da noantri esibio vol far conoser la storia de 'sta popolasiòn, 'na storia speso non conosù o mal 'nterpretà ma ch'invese merita d'eser fata conosere parchè a nostro aviso se pò tore exempio.
'l nostro repertorio musicae va da'a musica midioeval a quea tradisional e 'n ultima semo drio riscoprir gran parte del material recuperà: se trata de musiche che se sonava nea vila del Kaiser Franz Josef (e dopo ala corte del conte Arrigo Balladoro) che se trova rente Novaglie.
Le danse e la musica popolar ga senpre avesto funsiòn de riunir in alegria la jente, jutando a conoserse l'un l'altro e a dar pi' forsa ai legami nea comunità . Le xe sta e la xe un dei mexi pi' 'nportanti utilixà dae minoranse etniche par mantegner vive le so spesifiche culturai e xe insoma un patrimonio 'nportante da non butar via.
