I nostri strumenti musicaj
Tra le principaj atività dea nostra asociasiòn ghe xe 'l ricupero, la ricostrusiòn e 'l ristauro de strumenti musicaj. Da 'na parte, infati ghe xe el ricupero de strumenti pì o men veci trovà 'n particolar nea nostra vale e 'n general 'n tuta la Lesinia; da l'altra ghe xe 'l ristauro de strumenti par quasi miracolo retrovà, che speso xe in cative condisiòn a causa del tenpo e de l'incuria, ma che quando i vien "rimesi 'n vita" (coa nostra grandisima sodisfasiòn) i mostra tuta la so belesa, el so valor storico-cultural e i parmete de ricavar i sòni conpagni a quei del'epoca de proveniensa.
Putroppo la tradisiòn non senpre lasa 'na tracia direta de continuità col passà, e coxìta se rende necesaria la ricostrusiòn de strumenti musicalj in base a fonti "iconografiche", disegni e tratati.
El nostro grupo musicae xe un original ensemble che unise strumenti a fià e a percusiòn propri de'e bande, a strumenti antichi (midioevaj-rinasimentaj), a strumenti tradisionaj.
Par deso i strumenti ricuperà, ricostruii e in restauro, che vien usà ne'e nostre esibiziòn xe:
- Strumenti popolar: fisarmoniche a tastiera e a botoni, organeti, ghironde, racole de diversa forma, galicon e contrabasi, sboldron, mandolini, mandole, chitare, cornamuse (non solo quee nostrane ma ànca scossesi e musettes francesi), violini, ocarine, atanori, corno rìsolo, alphorn, campane e campanej.
- Strumenti bandistici: clarineti de tanti tipi, sasofoni, trombe, tromboni, otoni de vario tipo (ànca el trombin wagnerian), flauti dolsi e traversi, grancase, rulanti, sembali, piati, triangoli e tant'altre percusiòn.
- Strumenti antichi: kantele, liuto, organeto portativo, diana, dulcimera, altri salteri e tanti flauti de varie misure, dimensiòn e tono.
